විද්වත් හමුව
මේ තරගකාරී සමාජ ක්රමය
කාම ලෝකයකට අතවැනීමක්!
- පේරාදෙණිය විශ්වවිද්යාලයේ
සමාජ විද්යා අංශයේ මහාචාර්ය දයා අමරසේකර
වර්තමානයේ අපේ රටේ කාම අපරාධ සහ නොයෙක් අපරාධ පිළිබඳව වෙන කවරදාටවත් වඩා අසන්නට දකින්නට කියවන්නට ලැබෙනවා. ලංකාවේ මෑත ඉතිහාසය තුළ මෙවැනි විශේෂතාවක් දැකිය හැකි මෙම සමාජ පසුබිම සමාජ විද්යාත්මකව ඔබ විග්රහ කරන්නේ කොහොමද?
අප හැම කෙනෙක්ම මේ කාලෙ සිදුවන අපරාධ, කාමුක ක්රියාවන්, ලිංගික අපරාධ ආදිය ගැන කතා කරනවා. කම්පා වෙනවා. ඒත් ඒවා සිදුවන මේ කාලයේ කිසියම් සුවිශේෂත්වයක් තිබේද කියා හිතන්නේ නැහැ. අපට පෙනෙන අපරාධ තරමටම මේ "කාලය" ත් වැදගත් නිරීක්ෂණයට ලක්විය යුතු බවයි මා හිතන්නේ. ඇත්තෙන්ම මේ කාලච්ඡේදය දීර්ඝ කාලයක් ලංකාවේ සමාජයට කුරිරු සාපයක්ව තිබූ යුද්ධයේ භෞතික මුහුණුවර අවපාත වූ කාලයක්. පශ්චාත් යුද සමයක්. යුද්ධයක් වසර තිහක් තරම් දිගු කාලයක් තිස්සේ පැවතුණ රටක සමාජ ආර්ථික දේශපාලන සංස්කෘතික කඩාවැටීම් අනිවාර්යය ලක්ෂණයක්. යුද්ධය නිමා වූ පශ්චාත්a යුද සමයක සිදු විය යුතු මූලිකම දෙය තමා එම කඩා වැටීමට බඳුන්වූ සමාජය ප්රතිසංස්කරණය කිරීම. දැන් අප සිටින යුගය එසේ සමාජ ප්රතිසංස්කරණ යුගයක්. යුද්ධය නිමාවී වසර හතරක් පමණ ගෙවී ගිය සමාජ සංස්කෘතික ආර්ථික ප්රතිසංස්කරණයකට සුදුසු සමාජ පසුබිමක් ඇති යුගයක්. මේ යුගය තුළයි අපි අත් දකින්නේ ස්ත්රී දූෂණ, ලිංගික අපචාර, ගෘහස්ත ප්රචණ්ඩත්වය, ළමා ලිංගික හිසංන සහ පොදුවේ අපරාධවල ශීඝ්ර වැඩීමක්. සමාජය ප්රතිසංස්කරණ වැඩපිළිවෙළක් වේගයෙන් සිදු වනවා කියන මේ යුගය තුළයි මේ වාගෙ ශෝචනීය තත්ත්වයක් අපි අත්දකින්නේ.
ඔබ කියන්නේ මෙම පශ්චාත්a යුද සමය තුළ සමාජය නැවත පුනරුත්ථාපනය කිරීමේ වැඩපිළිවෙළක් නොමැතිවීම මේ තත්ත්වයට හේතුවක් බවද?
ඇත්තෙන්ම ඔව්. යුද්ධයෙන් බරපතළ ලෙස ගිලන් වූ මේ සමාජය නැවත ප්රතිනිර්මාණය කිරීමට අවශ්යයි.
සමාජ සංස්කෘතික අවශ්යතා රාශියක් තියෙනවා. අද හඳුනාගෙන තියෙන්නේ හුදු භෞතික ඉදිකිරීම්, මහාමාර්ග පාලම් දැවැන්ත කොන්ක්රීට් ඉදිකිරීම් ආදියෙන් පිරුන කෘත්රිම සංවර්ධනයක් කළ යුතුයි කියන අදහස පමණයි. උතුරු ප්රදේශයේ පමණක් නොව මුළු රටේම තත්ත්වය මේකයි. යුද්ධයෙන් ගිලන් වූ සමාජය සුබවාදී කිරීමට ඊට වඩා ජනතාවගේ සිත් සතන්වලට සම්බන්ධ වූ, ඔවුන්ගේ ජන ජීවිතයට එක එල්ලේම බලපාන පවුල කියන මූලිකම ඒකකයට තදින්ම දැනෙන සුධාරක වැඩපිළිවෙළක් අවශ්යයි. දුප්පත්කම වේගයෙන් පැතිරෙන කොට තම අවශ්යතා ඉටු කර ගැනීමට භාණ්ඩ මිලදී ගැනීමේ ක්රයා ශක්තියෙන් පිරිහුණු විශාල පිරිසක් ඉන්න කොට හොරකම, වංචාව, ප්රචණ්ඩත්වය පැතිර යනවා. ඒ වගේම මිනිසුන්ට තමා කවුද කියන එක අමතක වන මහා කලකිරීම්, ඉච්ඡා භංගත්වය, අසාධාරණය වැනි දේ පේනවා. ඒ සමගම තමා බැඳී සිටින පවුල වැනි ආයතනවලින් ගිලිහෙමින් හුදකලා චරිත බවට පත්වන ප්රවණතාවක් පේනවා. ස්ත්රී දූෂණ, කාම අපරාධ, ආදියට සම්බන්ධ වූ අයගේ ජීවිත දිහා බලන විට මේක පැහැදිලියි.
අපරාධ හා කාම අපරාධ හැමදාමත් අපේ රටේ අසන්න දකින්න ලැබුණා. ඒ කාලවලත් ඔය කියන සමාජ ලක්ෂණ අඩු වැඩි වශයෙන් තිබුණා නේද?
අපරාධ ගත්තත්, කාම අපරාධ, ගත්තත් අද ඒ පිළිබඳ දැවැන්ත රැල්ලක් ඇතැයි පේනවා. ඒත් මේ තත්ත්වය ටිකක් විග්රහාත්මකව බැලිය යුතු දෙයක්. මා හිතනවා අපරාධවල අති මහත් වැඩිවීමක් තිබෙනවා කියනවට වඩා අපරාධ සමාජගත වන වේගයේ විශාල වර්ධනයක් දකින්න පුළුවන් කියා. ඉන් අදහස් වන්නේ නැහැ අපරාධ අඩුයි කියා. පොලිස් අපරාධ අංශයේ වෙබ් අඩවිය තමා අපිට අපරාධවල අලුත්ම පුවත දැනගන්න තියෙන පහසුම මාධ්යය. එයට අනුව 2009 වසරට වඩා 2010 වනවිට හා 2011 වනවිට අපරාධවල ශීඝ්ර වැඩි වීමක් පෙනෙනවා. 2011 න් පසුව දත්ත ක්රමානුකූලව වෙබ් අඩවිවල නැති වුණත් පොලිස් වාර්තා බලන විට පේනවා 2011- 12 කාලවල අපරාධ රැල්ල වර්ණවත් කරමින් ලිංගික - කාමුක අපරාධවල වැඩිවීම, ළමා අපරාධ වැඩිවීම, එකම ප්රදේශවල අඛණ්ඩව අපරාධ රැල්ලක් පැතිර යැම. මේ ප්රවනතාව සාමාන්ය අපරාධ සිදුවීම ඉක්මවා සිතිය යුතු තත්ත්වයක්.
අපරාධ හා ලිංගික අපරාධ ඇයි මෙහෙම වැඩි වුණේ?
මූලිකව අද අපේ රටේ දැකිය හැකි දැඩි දේශපාලනීකරණ ක්රියාවලියතA ඒ එක්කම තියෙන දේශපාලන ප්රචණ්aඩත්වයත් එකට බැඳිල තියෙනවා. අද මේ රටේ හැම ආයතනයක්ම සේවාවක්ම දැඩි දේශපාලනීකරණය වූ තත්ත්වයකයි පවතින්නේ. සම්භාවනීය තනතුරු සියල්ලම අද මේ ප්රවනතාවට ගොදුරු වෙලා ඉවරයි. මෙතැන සිදුවන්නේ එකම මතවාදයක් පමණක් පැවතිය යුතුය යන අදහස. එකම රටක් එකම හඬක් කියා අප ඒ දරදඬු ඒකපාක්ෂික මතවාදයට ජාතික තත්ත්වයක් දෙන්න හදනවා. මෙහෙම වෙනකොට එම මතවාදයට අනුගතවන්න බැරි විශාල පිරිසක් වෛරයෙන්, ක්රෝධයෙන් පීඩනයට පත් වීම ස්වභාවිකයි. ඒ එක්කම මනාප මැතිවරණ ක්රමයන්ගේ පැවැත්ම සඳහා නාගරික පාදඩ අනාථ පංතිය හා ලුම්පන් පංතියේ සහාය අවශ්යම වෙනවා. ඒ එක්කම හිංසනය අපරාධ ගලා එනවා. එතකොට ප්රචණ්ඩත්වය පිටුපස දේශපාලන හස්තය අනිවාර්යයෙන්ම පේනවා.
ඔබ කියන්නේ රටේ විධිමත් හා අවිධිමත් සමාජ පාලනය බිඳ වැටී ඇති බවද?
ඔව්, ඒක අද අපි මේ කතා කරන ව්යසනයට අවශ්ය සංස්කෘතික පසුබිම නිර්මාණය කර තිබෙනවා. විශේෂයෙන් නීතිය හා නීතියේ ආධිපත්යය වැදගත්. සමාජ පාලනයට පොලිසිය, නීතිය, උසාවිය වැනි ආයතනවල ස්වාධීන ක්රියාකාරීත්වය අවශ්යමයි. අද මේ සියල්ල බිඳ වැටී නැද්ද? දේශපාලන බලපුළුවන්කාරකම් නිසා අපරාධ යටපත් වී යනවා. නීතිය ක්රියාත්මක වන ආයතන කෙරෙහි ඇති සමාජ විශ්වාසය බිඳවැටීම මේ සමඟ සිදු වෙනවා. දැන් බලන්න, අපි දැක්කා ප්රධාන පාසල් දෙකක ළමුන් එළියට පැන ගල් මුල්වලින් විදුහල්පතිවරුන්ට පහරදී ඔවුන්ගේ රථ විනාශ කරන ආකාරය. මේ දර්ශනය තුළින් අපට කියන්නේ මොකක්ද? රටේ නීතිය බිඳ වැටීම නේද? එම නීතියට ගරු නොකිරීමේ ෙ€දවාචකය අද පාසල් සමාජය තෙක් පැමිණ තිබෙනවා නේද?
ලිංගික අපරාධවල සමාජ පසුබිම ඔබ දකින්නේ කෙසේද?
ලිංගික ආශාවන්ගෙන් පිරුණ සමාජ වපසරිය නූතනයේ වයස් තරාතිරමකින් තොරව තරුණයාගේ සිට මහල්ලා දක්වා පුළුල් වී තිබෙනවා. මෙයට මූලික හේතුව ලිංගිකත්වය සම්බන්ධව පවතින සමාජ ප්රතිමාන, ධර්මතා, විශ්වාස, ආකල්ප ආදියෙහි පැවැති වලංගුතාවය අද හීන වී පැවතීමයි. මිනිසුqන්ට ලිංගික ජීවිතය කියන එක පිළිබඳව ඇති ආශාව දියුණු තියුණු වෙන්න අද පවුල කියන ආයතනයේ කඩාවැටීම බලපාල තියෙනවා. මිනිසුන් ඒ නිසාම පවුල තුළ හුදකලා වූ ස්වරූපයක් තියෙනවා. අනිත් පැත්තෙන් බිඳුණු පවුල් නිර්මාණය වීමත් වැඩිවෙලා තියෙනවා. පවුල කියන සාම්ප්රදායික ආකෘතිය තුළ තමන් හිරවී සිටිනවා කියන තැනට අද බොහෝ දෙනෙක් පත් වෙලා. පවුලෙන් පරිබාහිරව ආදරය සෙනෙහස වැනි චිත්තවේගී දේවල් හොයාගෙන යැමේ අවශ්යතාව ඇති පිරිස විශාල ලෙස වැඩිවෙලා. ඉලෙක්ට්රොනික විද්යුත් මාධ්යවල මිතුරු සමාජ දිහා බලන විට මේ තත්ත්වය හොඳටම පැහැදිලියි. කාගෙන් හෝ රැකවරණයක් ලිංගික සතුටක් ලබා ගැනීමේ ප්රවනතා අද වේගයෙන් වැඩිවෙලා තියෙනවා.
ලිංගික අධ්යාපනය සහ මිශ්ර පාසල් වැනි දේ කාම අපරාධ අතර ගැලපීමක් ඇතිකරන්න යොදා ගන්න බැරිද?
මා එය පිළිගන්නේ නැහැ. ලිංගික අධ්යාපනය පාසල් මට්ටමේ සිට ලබා දීමෙන් කාම අපරාධ අඩුවේය කියා හිතන්න බැහැ. ලිංගික අධ්යාපනයකින් දෙන්නේ ජීව විද්යාත්මක දැනුමක්. කාම ලෝකය කියන්නේ එයට වඩා විස්තාරණය වූ එකක්. ඒක තේරුම් ගන්නේ පුද්ගලයාගේ පෞරුෂය සහ පෞරුෂ ගති අනුවයි. පෞරුෂය සකස් වන්නේ ඉගෙන ගන්නා දෙයින්ම නොවේ. සංසාරික පුරුදුත්a ඊට බලපානවා. අනික ලංකාව වැනි රටක ගම්බද පාසල්වල දැකිය හැක්කේ ඇමරිකාව වැනි රටවල ගම්බද පාසල් නෙවෙයි. ආගම පාසල් දරුවන්ගේ ගම්වල තවමත් ප්රධාන සමාජ පාලන උපක්රමයක්. ලැඡ්ජාව බය වැනි දේවල් නිසා තවමත් පාසල්වල විනය සදාචාරාත්මක කාරණාවල ස්ථාවර බවක් තියෙනවා. ලිංගික අධ්යාපනය උගන්වන්න එබඳු සමාජ පසුබිමක අමාරුයි. එහෙම ඉගැන්නුවා කියා විභාගවලට යොමු වුණ අධ්යාපන ක්රමයක් තියෙන රටක දරුවන්ගේ ජීවිතවලට බලපෑමක් ලැබේ යෑයි හිතන්න බැහැ.
පුද්ගලයාට තමා තේරුම්ගත හැකි, මනුස්සකම තේරුම් ගත හැකි වටපිටාවක් පාසලින් නිර්මාණය කිරීමයි වැදගත්. මිශ්ර පාසල්වල ඉගෙනුම ලැබීම කාම අපරාධවලට පෙළැඹීම අඩුවීමක් කියා කියන එකත් මා පිළිගන්නේ නැහැ. ස්වාභාවික වරණ න්යාය කියන මානව විද්යාවේ තියෙන න්යායකින් උගන්වනවා දිගුකලක් ලේ නෑයන් සමගම සිටීමෙන් ලිංගික උත්කර්ෂණය ඔවුන් අතර ඇතිවන බව. නමුත් අද එම අදහස ප්රතික්ෂේප වී තිබෙනවා.
අද පවතින ලිංගික අපචාර සමග පවුලේ බිඳවැටීම වගේම නාගරීකරණය, ගම් අතහැර නගර කරා යැම වැනි කාරණා මෙයට බලපාන්නේ කොහොමද?
අද තියෙන්නේ දුවන සමාජයක්. ලොකු තරගයකින් දිව යන සමාජයක්. අධ්යාපනය අද හරියට මිල අධික භාණ්ඩයක්. ඒක මිලදී ගන්න නගරයට යන්න ඕන. ටියුෂන් ව්යාපාර තියෙනවා. ඒ වගේම පෞද්ගලික වෛද්ය මධ්යස්ථාන තියෙනවා. අද ළමා ලිංගික අපචාරවලට ටියුෂන් ව්යාපාරය නිසා රුකුලක් ලැබෙනවා. බාලක බාලිකාවන්ට කාමර කුලියට දීම අද ප්රධාන නගරවල ඕන තරම් දකින්න තියෙනවා. අද ගුරුවරයා වුණත් මේ සමාජ පසුබිමේම නිර්මිතයක්. හැම කෙනෙක්ම මේ දුවන සමාජයට කැමැතියි. මේ දුවන දිවිල්ල කාම ලෝකයට අතවැනිල්ලක් වන්න තියෙන ඉඩකඩ වැඩියි. ඒ වගේම අද තරුණයාගේ විවාහ වීමේ වයස කල් යන ප්රවණතාව පේනවා. විවාහ කල් පමාව බරපතළ ලෙස තරුණයන්ට බලපානවා. මේ තත්ත්වය තුළ ලිංගික උත්කර්ෂණය සමනය කරගැනීමට ක්රමෝපායන් අවශ්ය වී තිබෙනවා. මෙබඳු තත්ත්වයක් යටතේ අද කාම වෙළෙඳපොළේ ශීඝ්ර ව්යාප්තියක් තිsබෙනවා. අසැබි චිත්රපට අද නැරඹීමේ පහසුකම් වැඩියි. අන්තර්ජාලය තුළ ඒවාට වඩාත් ඉඩකඩ පැතිර තිබෙනවා. ෙµaස් බුක් හරහා අපිට අහන්න ලැබුණ සිදුවීම් බොහොමයක් නතර වී තිබුණේ කොතනද? ලිංගික ලෝකයක.
දෙවනුව මේ අපරාධවලට සමාජය තුළ ලැබෙන වැරැදි පූර්වාදර්ශයන්ද තදින්ම බලපාන බව මගේ අදහසයි. අද අප දකින බොහෝ ජනකාන්ත චරිත ඇත්තෙන්ම සදාචාරාත්මක නෑ. ඔවුන්ගේ ලිංගික ජීවිතය අප්රසන්නයි. ඔවුන් බොහෝ විට මාධ්යවලින් තමන්ගේ පෞද්ගලික ජීවිතය පිළිබඳව කියන දේවල් අසත්යයයි. එහෙත් මේ අය වටා අන්ධානුකරණ සමාජයක් ඉන්නවා. අද සමාජය ඉල්ලා සිටින චරිත මේවායි. මේ අයගේ ජීවිතවල වැරැදි තැන් සුළුවෙන් හිතන අය තමාගේ ජීවිතය ගැනත් තියෙන වගකීම සුළුකොට ගැනීමක් කරනවා.
අපේ රටේ අපරාධ හා කාම අපරාධ වර්ධනයට බලපෑ වෙනත් ප්රධාන හේතු මොනවාද?
මා හිතනවා ලංකාවේ දිගු කාලයක් පැවැති යුද්ධය මෙයට බලපෑ එක් ප්රධාන සාධකයක් කියල. බලන්න මෙයට සම්බන්ධ වූ ප්රධාන කණ්ඩායම් දෙකම සිදු කළ පුද්ගල ඝාතන සමග ප්රචණ්aඩත්වය සමාජගත වී සාමාන්ය දෙයක් බවට පත්වුණා නේද? ඒ වගේම යුද සමයේ සිදුවුණ මත්ද්රව්ය ජාවාරම, අවි ආයුධ වෙළෙ¹ම, ඒවායේ අනිsසි භාවිතාවන් අදටත් මුළුමනින්ම නැවතී ඇද්ද? මේ හැර ආරක්ෂක අංශ අතහැර ගිය අවි පුහුණුව ලත් සොල්දාදුවන් සමාජයෙන් වසන් වී පැහැදිලි ජීවනෝපායක් නැතිව පිපාසිතව සිටින තත්ත්වයක් අපට හඳුනා ගත හැකියි. මේ අය හුඟාක් කාම අපරාධවලට සම්බන්ධ බව අපට කියවන්න ලැබුණා. පීඩනය කළකිරීම, සමාජ වෛරය කොතැනින් හෝ පුපුරා යැමක් හැටියට එය සැලකිය හැකියි. ඒ වගේම අද ග්රාමීය සමාජය සතු අනන්යතාව ගිලිහිලා. ගම ස්වයංපෝෂිත ඒකකයක් නෙමෙයි. නගර සහ උප නගරවල ප්රාදේශීය දේශපාලන බලවතුන් ගම පාලනය කරනවා. ගමේ තරුණයන් ගමට නායකත්වය දෙන්නේ නැහැ. හැම කෙනෙක්ම බලන්නේ නගරයට එන්න. මේක හරියට නගරය විසින් ගම සූරා කෑමක් වාගේ. ගම පිළිබඳ කොපමණ ව්යාපෘති තිබුණත් ගැමියන් අද ස්වයංපෝෂිත නෑ. මෙබඳු පසුබිමක් තුළ අපරාධ සඳහා හොඳ තෝතැන්නක් බවට ගම පත්වෙලා.
අද ආගමත් එක්තරා විදියකට වාණිජකරණයට ලක්වීම මේ තත්ත්වයට බලපාන්නෙ කොහොමද?
ආගම - පන්සල කියන්නේ ප්රබල සමාජ ආයතනයක්. එදා සමාජයේ එය බහු කාර්ය ආයතනයක් වුණාට අද එහෙම නෑ. අද පන්සලේ කාර්යය මොකක්ද කියා හිතා ගන්න අමාරුයි. හැමතැනම පුද පූජා සහ චාරිත්ර විශාල වශයෙන් තියෙනවා. දහම් පාසල් බෝධි පූජා හැම ගමකම දකින්න තිබෙනවා. ඒත් අපරාධවල අඩුවක් තිබෙනවාද? මේකට හේතුව මේ 'ජනප්රිය බුද්ධාගමින්' අපගේ ජීවිතවල හැඩගැස්වීමට ප්රබල බලපෑමක් සිදු නොවීමයි. මේ තරගය, බල අරගලය භික්ෂු සමාජය තුළත් තියෙනවා. මෙහෙම තත්ත්වයක් යටතේ අපට දැහැමි සමාජයකට ආගම උපකාරී වෙතැයි සිතීම අමාරුයි.
අපරාධ හා කාම අපරාධවල වර්ධනය ගැන මුද්රිත හා විද්යුත් මාධ්යවලටත් යම් චෝදනාවක් එල්ල වී තිබෙනවා නේද?
ඔව්. මා හිතනවා. බොහෝ විට මාධ්ය මගින් අපරාධ ප්රතිනිර්මාණය කිරීමක් කරන තැන් මා දකිනවා. පුවත් මැවීම, සඳහා තියුණු වෙළෙඳපොළ තරගයක් ඇති සමාජයක, අපරාධ ආකර්ශනීයව ජනතාව වෙත ගෙන යාමත් පෙනෙනවා. අනෙක් අතට දරුණු අපරාධකාරී හැසිරීම්, එපරිද්දෙන්ම ප්රතිනිරූපණය කොට පෙන්වන රූපවාහිනී වැඩසටහනක්ද අපි දකිනවා. මේවායින් සමාජයට සිදුවන බලපෑම සංවේදීව සිතනවාට වඩා සිතන්නේ සිද්ධිය සවිස්තරාත්මකව හා ආකර්ශනීයව පෙන්විය යුතුය යන අදහසයි. අපරාධ, කාම අපරාධ ඉතාම සුළු සාමාන්ය සිදුවීම් සාමාන්ය පුවත් බවට අද සාමාන්යකරණය වීම තුළ ඒ පිළිබඳ ප්රබල හඬක් නැඟීමට නොහැකි වී තිබෙනවා.
අද සමාජය තුළ ශීඝ්රයෙන් පැතිරී යන මේ ව්යසනකාරී තත්ත්වය පාලනය කිරීම කළ හැක්කේ කෙසේද?
පොදුවේ ගතහොත් මේ වේගවත් පාරිභෝජන සමාජය අපි හොඳින් තේරුම් ගැනීම වැදගත්. මේකෙන් අපට ඇති කරන මහා කම්පනයත්, බලාපොරොත්තු කඩවීමෙන් ලබන උද්වේගයත් අප තේරුම් ගත යුතුයි. අනික ආගම වැනි සමාජ ආයතන අද හුදෙක් ජනප්රිය පුද පූජා චාරිත්රවලට පමණක් සීමා වෙලා. එම තත්ත්වය වෙනස් වීම වැදගත්. ආගම අපේ ජීවිතයට සම්බන්ධ කර ගත හැකි වැඩසටහන් අවශ්යයි. තුන්වෙනුව අපි වැඩිහිටියන් දරුවන් විදිහට දුරස්ථ නොවිය යුතුයි. පරම්පරා පරතරයක් අප අතර ඇතිවීමට අපේ සංස්කෘතියෙන් ඉඩක් දී නැහැ. එදා තිබූ එම තත්ත්වය අපි යළි ඇති කරගත යුතුයි. මනුස්සකම කියන එක තරම් වටිනා තවත් දෙයක් අපට නැති බව තේරුම් ගත යුතු තැනට අද සමාජය පත් කළ යුතුයි.
සාකච්ඡා කළේ
පාලිත සේනානායක
No comments:
Post a Comment