රහස් පොලිසිය මගින් අත්අඩංගුවට ගනු ලැබූ ජාතික සමගි පෙරමුණේ නායක අසාද් සාලි මහතා ඊයේ (3 දා) කොළඹ ජාතික රෝහලට ඇතුළත් කර තිබේ.
පොලිස් අත්අඩංගුවට පත්වීමෙන් පසු ඔහු දිගින් දිගටම ආහාර වර්ජනය කිරීම නිසා මෙසේ රෝහල් ගත කෙරුණු බව වාර්තා වෙයි.
රෝහල්ගත කළ අසාද් සාලි මහතා කොළඹ ජාතික රෝහලේ 55 වැනි වාට්ටුවට ඇතුළත් කෙරුණු බව ජාතික රෝහලේ ප්රකාශකයෙක් සඳහන් කළේය. අසාද් සාලි මහතාට අවශ්ය ආහාර පාන සියල්ල ලබා දුන් බවත් ඒ මහතා එම ආහාර ගැනීම ප්රතික්ෂේප කර ඇති බවත් එම ආරංචි මාර්ග වැඩිදුරටත් කීය.
ඒ මහතා මෙසේ අත්අඩංගුවට ගනු ලැබුවේ රට තුළ නැවත ත්රස්තවාදය ඉස්මතු වන ආකාරයට ප්රකාශ නිකුත් කළැයි කියන සිද්ධියක් සම්බන්ධයෙන් ප්රශ්න කිරීම සඳහාය.
මුස්ලිම් තරුණයන් ආයුධ අතට ගතයුතු කාලය එළඹ ඇති බවට වෙබ් අඩවියකට සහ ඉන්දීය සඟරාවකට ප්රකාශයක් කළ බවට ඒ මහතාට එරෙහිව චෝදනා එල්ල වී ඇත.
අසාද් සාලි මහතා මුස්ලිම් සන්නද්ධ කණ්ඩායම් සමග සම්බන්ධතා පවත්වන්නේද යන්න පිළිබඳව ද අපරාධ පරීක්ෂණ දෙපාර්තමේන්තුව පරීක්ෂණ පවත්වාගෙන යයි.
එහෙත් මෙවැනි ප්රකාශ කිසිවක් තමන් නොකළ බවත් මෙම අත්අඩංගුවට ගැනීම ඉතාම අසාධාරණ ආකාරයට සිදු කර ඇති බවත් අසාද් සාලි මහතා පවසයි.
උපුටා ගැනීම : දිවයින පුවත්
No comments:
Post a Comment